Luby pśedsedaŕ Jan Nuk, lube bratśi a sotše!
Dokulaž njamogu se na „Forumje k pšašanjam korporacije zjawnego pšawa“ na 08.03.10 w Serbskem domje w Budyšynje wobźěliś, cu na tom puśu někotare mysli k tomu dodaś.
Pśi pśecytanju zběrku „Podłožki k zjawnopšawniskemu zastupnistwu zajmow Serbow“ jo mě ako prědne do wocowu biło, až smy ako Serby na samskem niwowje ako pśed wosymi lětami, což potrjefijo možnosći statkowanja w pšawniskem ramiku Nimskeje.
Jo pśecej zasej zajmawe, až nimske juristy argumentuju z tym, až božko po nimskim pšawom žedne optimalne možnosći za podpěrowanje a spěchowanje rěcy a kultury serbskego luda njeeksistuju. Pśed skoro dwaźasća lětami su Serby pśišli do Zwězkoweje republiki Nimskeje a až do źinsajšnego dnja njejsu měli dawarjow kaznjow za trjebne na to glědaś, co Serbam ako nowym staśanam tyjo, ale jano na to, kak mogu Serbow do korseta kaznjow a pśedpisow starych zwězkowych krajow zarědowaś.
Njejsom tak spokojom z statusom Domowiny ako zapisane towaristwo, dokulaž popšawem ma z tym Domowina z.t. samske pšawa ako Sportarske towaristwo Zeleno- běły Dešno z.t.
Na drugem boce pak njamam z praktiskich pśicin „Korporaciju zjawnego pšawa“ za dobru.
Bliskosć stata a wjetšy doglěd zwězkowego pśespytowańskego zastojnstwa mě pśi tom njemolitej. Ale až kuždy, kenž jo něnto cłonk Domowiny, lěc pśez kupku, pśez kulturne towaristwo abo sam, da se zapisaś ako Domowinaŕ, mam za iluziju. Nic jano w spěchowańskem towaristwje „Domowniski muzej Dešno“ z.t. su luźe, kenž njekśě ako wosobina w Domowinje byś, lěc rownož Serby su. Mimo togo jo sebjewědobnje ako Serb w Dolnej Łužycy kradu mało. Njeby za to rukował, až se kuždy serbski błotojski rybaŕ zapišo do lišćinje ako Domowinaŕ a z tym by wuznał ako serbski. To pak by po něntejšnych kaznjach korporacije zjawnego pšawa trjebne było. Tak to jo teke pla Ewangelskeje cerkwje. Tam jo to pšawje tak, dokulaž jano ako cłonk cerkwje maš pšawo twojo goletko dupiś daś abo se wobźěliś aktiwnje abo pasiwnje na wolbach wšakorakich rowninow.
Gaby pśez to, až se kuždy źinsajšny cłonk Domowiny njeregistrował ako Domowinaŕ a by spadowało cłonkojstwo našeje narodneje organizacije mojogodla na 3000, kak comy potom zašćitowaś naše pominanje, zastupowaś zajmow wšych Serbow? K tomu pśiźo, až w Ewangelskej cerkwi zapłaśi kuždy swoje danki centralnje a centrala krajneje cerkwje rozdźělijo ze sumy wšych dankow pjenjeze na wosady.
Až muse samo ateistiske luźe, kenž dostanu pjenjeze za bźezdźěłabne, wot tych pjenjez cerkwine danki zapłaśiś, jo pokaz na bliskosć stata k Nimskej ewangelskej cerkwi a sromata kasěrarjow wšych bokow.
Cwiblujom na to, až se goźi ten cerkwiny system rozdźělenja pjenjez za Domowinu, glědajucy na to, až na pś. Župa Dolna Łužyca pśi wšyknych se goźecych abo njegoźecych goźbach wobtwarźijo samostatnosć župy napśeśiwo „centrali“ (zwězkoju Domowiny) w Budyšynje.
A na końcu mojich wobmyslenjow k aktiwitam. Wobźelenje ewangelskich luźi namšach a wobźelenje nimskopowědajucych Domowinarjow na kursach serbskeje rěcy stej niźi na samskem niwowje. To jo w tom paźe wšojadno. Ja pak njewěm, kak to wuglěda na wolbach. Joli mogu se jano hyšći Domowinarje wobźěliś na wolbach, na pś. za serbsku radu, kak mocny jo potom zakład (fundament) za wuspěchy tych wolbow w serbskej ludnosći, joli by měła Domowina wopšawje jano hyšći 3000 cłonkow? Wěmy, až kuždy nimski staśan njechojźi k wolbam. Njama lušt, zajm, chylku, jo pśegłupy abo njamožo cuś ceły politiski system. To wšykno mamy w Serbach a mjazy Serbami teke. Njok, až wot 3000 cłonkow du 1400 wolit, jaden kandidat dostanjo wot tych 1001 głosow a na końcu wolbow ten zapowěda: „Serbski lud jo mě swoju dowěru wupowědał!“ Takich bajkow 1001- głosow som słyšał wot nimskich politikarjow južo cas mojogo žywjenja. Nic wšykno, což jo pla Nimcow z wašnju, tyjo Serbam.
To su moje mysli za diskusiju w „„Forumje k pšašanjam korporacije zjawnego pšawa“.
Snaź se wukopa ceła nowa droga w běgu diskusije. Z źinsajšnego wida (25.02.2010) som za to, až Domowina njebuźo korporacija zjawnego pšawa.
B. Pittkunings, Dešno
Cłonk zwězkowego pśedsedarstwa Domowiny
